روايةالله لايحرمني منك>>>>

السلام عليكم ورحمة الله وبركاته
انا اموووت بشي اسمه قصص وروايات و هذه القصه قراءتها في احد المنتديات واعجبتني.. .. وان شاء الله تعجبكم ..

واتمنى الاقي منكم ردود وتعليقات

الجزء الأول

حلا بنت في اولى جامعة .. عايشة مع ابوها وامها وماعندها الا اخت وحده اصغر منها .. اسمها شوق ..

ملامحها ناعمه اذا كانت ساكته تفكر أو تتأمل .. تطلع جذابه .. واذا ابتسمت او ضحكت واستحت .. تبين عليها براءة مو طبيعية

, شعرها أسود وكثيف .. لكنه مو طويل مره ..

نحيفة شوي , وطولها متوسط ..

تحلّيها روحها .. !

يعني الواحد لما يجلس معاها ويعرفها , تحلى بعينه زياده من شفافيتها ..

جمالها الداخلي يطغى على الخارجي ..

توها السنة داخلة أولى جامعة .. سجلت في كلية العلوم .. ماتدري هي بتستمر فيه ولا بتحوّل .. !

مرّ من السنة الدراسية اسبوعين بس ..

وطاح ابوهم في المستشفى فجأه , وبدون سبب ..

حلا : هلا والله بأحلى صديقة في الدنيا

غدير : هلا والله ياقلبي انتي , شخبارك ؟

حلا : تمام الحمد لله انتي كيفك

..... : الحمد لله , شخبار ابوك ان شاء الله صحته أحسن الحين ؟

..... : الحمد لله يتحسن , انا الحن في السيارة رايحة له المستشفى مع امي وشوق

...... : طيب اخليك الحين , سلمي على امك

..... : وش فيك انتي هبله سولفي عادي

..... : ترا ماعندي شي بس قلت بشوف شخبار الجامعة معك ؟ ( غدير داخله علوم صحية)

...... : اسكتي بس ترا ودي ارجع للثانوي مو متأقلمه مع الوضع ابد

...... : لا حرام عليك والله الجامعة احلى بكثير بكثير , تحسين انك فتاة ناضجة

...... : هههههه لا ابشرك مازلت احس اني بزر , ما نضجت او عقلت

........ : لا ان شاء الله يارب تعقلك الجامعة

........ وهي تاكل حلاوة خذتها من عند شوق : يصير خير , غدير عندي حلاوة تبين ؟

........ : وش اللي يصير خير شكله مافي امل تعقلين , شوق اكبر منك هههههههههههههههه

....... : هههههه غدير عادي , اسمعي انا وصلت الحين بنزل من السيارة , يللا مع السلامه

...... : اوكي الله يقوم ابوك بالسلامه , اشوفك على خير ..


سكرت حلا من صديقتها , خذت شوق اختها ونزلتها من السيارة

ام حلا : حلا حبيبتي اسمعي , لازم مانطول عند ابوك

حلا بخوف : ليه ابوي فيه شي ؟

...... وهم يمشون للغرفة : ها ؟ لا مافيه شي بس مو زين الزياره الطويلة له ..

حلا بأسف : طيب

دخلت حلا على ابوها وحبته على راسه : شخبار باباتي اليوم ؟

ابوها بتعب : هلا بنتي هلا والله

حلا دفت ابوها شوي وانسدحت على طرف السرير جمبه : يللا بابا متى تصير اوكيه وترجع لنا ؟

ام حلا : حلا وخري عن ابوك شوي تراه تعبان مو تلصقين فيه , شوق اللي عمرها 5 سنين ماسوت مثلك

حلا بزعل : شفيها ماما والله مشتاقة له ,( وتطالع ابوها ) بابا انت متضايق مني ؟

ابوها : لا طبعاً بالعكس مبسوط , بس امك غارت ودها لو انها مكانك

ام حلا استحت : محمد بس عاد

شوق طبت على السرير : بابا انت شفيك ؟

محمد طالع في منيره ام حلا بعدين قال : بس السكر مرتفع عندي شوي

شوق طالعت في حلا يعني مو فاهمه ,

حلا ابتسمت : شوق تعالي ننزل الكافتيريا , نخلي ماما وبابا مع بعض شوي لحالهم

محمد : شيطانه يا حلا , كنك تدرين ان عندي كلام لأمك ..

حلا وهي تحمل شوق وتضحك : كلام العين , بيحكي عن اللأشواق , دليلي ... ( وطلعت وهي تكمل الأغنية ... )

كانت حلا ماسكة شوق وتمشي فيها لين الكافتيريا , حلا كانت تتحجب ,واحيانا تقط الطرحة على وجهها , ابوها وامها فري حيل , بس نظراتها البريئة تحب تتلفت على كل شي حولها ,,

شافت ممرضة ماسكة تقارير وتمشي , تخيلت صديقتها غدير تصير كذا بيوم من الأيام ..!

وتذكرت نفسها ..

وشو طموحها ؟ هي حتى تخصصها ما تدري وشو .؟

وش ممكن تطلع ؟ ممرضة ولا مدرسة ولا موظفة ..!

وش الأنسب لها .. وأريح لها ..

التفتت حولها دقيقة , فقدت شوق ..

اوووو هذي وين راحت ..

ياربي انا شلون ماحسيت بيدها تفلت من يدي ..!

وسّعت حلا خطواتها .. لأقرب رسبشن , وكان فيه موظفه تشتغل ..

حلا :hello excuse me have yiu seen a little girl ?

الممرضة : I am sorry , you can ask that security

راحت حلا من عندها .. للموظف اللي واقف يطالعهم من بعيد

حلا : لو سمحت اخوي , ماشفت بنت صغيرة شعرها قصير ولابسة وردي ؟

الجزء الثاني

دخلت منيرة بيت اختها عزيزة ,, ووراها حلا وشوق , بخطوات خجولة
منيرة : لا وصّيك على بنتي ها ! انتهبي لها
عزيزة : افا عليك احطها بعيوني الثنتين .
حلا استحت وابتسمت بطفولة : مشكورة خالتي ماتقصرين
جلست حلا على الكنبه بعباتها وطرحتها , ودخلت في سوالف مع منال , انبسطت عليها ..

وشوي الا دخل طلال للصالة ..

راح وحب راس امه وسلم على خالته

عزيزه : طلال , هذي حلا بنت خالتك وهذي الصغيرة اسمها شوق

طلال وقف قدام حلا وقال بكل تلقائية :هلا حبيبتي حلا , في صف كم أنتي ؟ ( فكر شوي وقال ) ثالث متوسط صح ؟

الكل ضحك الا طلال وحلا اللي كان طايح وجهها بس حبت تسوي جو وقالت : دبّ , انا بأولى جامعه

طلال فتح عيونه على الآخر والتفت على منال : من جدها هذي ؟

منال : أي طلال وشفيك ؟

طلال : سبحان الله تركض السنين ..! ( وشال شوق وحبها ) أي هذي اذكرها دايم اشوفها , اما حلا مانشوفها دايم ( والتفت عليها ) ليش حلا ؟

منال : موجوده , بس انت دايم عند عمامي ..

طلال : طيب انا طالع ابدل , حلا خذي راحتك ..

عزيزة استأذنت وطلعت ورا طلال لغرفته ..

عزيزة : طلال لو سمحت , ابيك كذا تمون عليها , اعتبرها اختك , لا تبين لها انك مستحي منها تستحي زياده

طلال : عادي يمه تبيني استأجر شقه او غرفه في فندق عشان تاخذ راحتها احسن

عزيزة : لا والله تزعل , وتتضايق أكثر بعد , خلنا بطبيعتنا أحسن , بس انت تصرف على طبيعتك سولف ودردش بس بحدود ها ؟

طلال : افا عليك يمه انتي قاعده تحرصيني ؟ هذي حسبة منال ! إلا تعالي يمه , من جدكم هذي صارت بالجامعة ؟

عزيزة : شفت شلون ؟ الله يالدنيا .. يللا حبيبي بدل ملابسك وارتاح شوي ..

طلعت عزيزة من عنده وظل يتذكر ..

يوم كانوا صغااااار , خطبوا له حلا , بس كذا يستهبلون , وسمّوهم لبعض ..

بس الحين وييييييين , ماتوقع حتى حلا تتذكر السالفة .. !


بدل طلال ملابسه , وانسدح على السرير ..

جلس يفكر في بنات خالته .. حلا وشوق ..

هو مو متعود يسولف كثير مع بنات خالته او يحتك فيهم ..

ودايم مع عمامه ..

دخل يدينه ورا المخده وهو يطالع السقف ويفكر .. كيف بيتأقلم معاهم , ويريح بنت خالته ومايحسسها انها غريبة عنهم ..

وخاصة انه الرجال الوحيد في البيت , بيصير مسؤل عنها بعد ..

بس شكلها ماودها تجي عندنا , شكلها منحرجة أو مغصوبة علينا ..

يللا .. مابيدها شي , اكيد ما جات عندنا برغبتها , خالتي منيرة واعرفها , تسوي اللي براسها ..


في نفس البيت بغرفة منال : حلا اذا ماودك تقعدين لحالك تعالي عندي بالغرفة ترا والله أطفش بلحالي

حلا منحرجه : عادي والله أي مكان

عزيزة : حلا حبيبتي الغرفة اللي اغراضك فيها والله مو غرفة احد , كلها حلالك انتي وشوق , ومعاها حمام بنفس الجناح , خذي راحتك .. واي شي تبينه لا يردك الا لسانك

منال تروح يم حلا : ايه معليه بس تسهر معاي بالغرفة تونسني شوي وتجلس معاي , وغرفتها بس وقت النوم
ولا اقول لك حلا , جيبي اغراضك هنا

حلا تضحك : خلاص عادي والله بقعد معك بس اخاف اجيب اغراضي نحوس عليك الغرفة انا وشوق

عزيزة : معليه منال خليها على راحتها , يللا انا نازلة تحت

منال كانت جالسة على السرير وقالت وهي تطرقع اصابيعها وتبتسم : يللا سولفي

حلا طبت على السرير بكل براءه : انتي سولفي انا ماعندي شي

منال : طب اول شي فكي حجابك ترا طلال مايدخل بدون مايدق الباب ..

حلا فكت طرحتها علطول : فشله في اخوك الحين ماياخذ راحته حتى في بيته

.... : ماعليك منه , ترا هو يمون عادي . بعدين انتي تتحجبين اساساً يعني عادي ..

حلا وهي تفكر بعمق : طيب , وين شوق ماشفتها ؟

...... : تلقينها عند امي او طلال , تعالي نروح الصالة نشوفها , أي صح , عندك بكرة جامعة ؟

...... : ايه عندي

...... : السواق يوديك ؟

...... : ايه

...... : طيب تعالي معنا لا تروحين بلحالك مع السواق

حلا وهي تبتسم : عادي , متعوّده

منال : انتي كذا فري الموضوع عندك عادي ؟

حلا : مدري , امي وابوي عودوني كذا, بس مايفرق معي صراحه ..

....... : طيب , تعالي معنا والله تنبسطين , ترا طلال في السيارة يوسع الصدر ..

...... وهي تمشي مع منال للصالة اللي في الدور الاول : لا مشكورة , بنتعب طلال , انتي بعليشه وانا بالملز .. مشواااااار ( وضحكت ببراءة ) الحين توقف السيارة بنص الطريق ويخلص البنزين

منال : امشي بس يالخبلة ..

شوق من شافت اختها داخلة الصالة .. قامت من حضن طلال وركضت لاختها

حلا تشيلها : هلا حبيبتي

شوق : حلا انا وطلال لعبنا بالتلكيبات ( تركيبات )

حلا بعفوية : والله ؟ سويتوا اشكال شوي ولا كثير ؟

شوق تركض لعند طلال وتطل فوجهه : طلال كم وحده سوينا ؟

طلال يضحك : ثلاثة , حلا ,منال تعالوا العبوا معنا

منال جلست على الكنبة ومسكت الريموت بتفتح التلفزيون

طلال حس ان حلا ودها تلعب معهم بس مستحيه لحالها ,,

التفت على منال وقال : منال اتركي التلفزيون وتعالي , حلا شكلها ودها تلعب بس مستحية ( وابتسم )

حلا ببراءة : لا والله انا ماقلت كذا

طلال : عادي وشفيك مافيها شي شوفي انا كم عمري وجالس العب

منال جلست جمب طلال وشوق على الأرض وقالت باستهبال : حلا اجلسي , ترا الألعاب هذي كلها حقة طلال , لا طفش يلعب فيها ..

طلال : نصابة ماعليك منها

عزيزة جاية من الغرفة : ها شوق تلعبين مع طلال ؟ حلا اجلسي ليه واقفه ؟؟


جلست حلا جمب منال من الجهة الثانية وهي متطمنة , طلال شكله طيب حيل , ومنال بعد .. من اولها حبوا شوق وخذوا عليها .. الحمد لله

عزيزة جلست جمبهم : حتى انا بعد بلعب معكم

طلال : عرفتي حلا ليه انا شاري الألعاب ؟ عشان امي توسع صدرها شوي عقب المطبخ والشغل

عزيزة تدفّ طلال اللي كان يضحك على امه وهي معصبة : بسّك عاد , العب وانت ساكت , وعطني اللون الأخضر اللي عندك

الكل ضحك على عزيزة , واولهم حلا : خالتي والله انكم توسعون الصدر .. الله يديم عليكم جمعتكم ووناستكم

عزيزة : الحمد لله انبسطتي علينا

منال : ايه اشوى على بالي انها اول ماتجي بتقفل على نفسها الغرفة وماتطلع إلا بالموت

حلا ابتسمت ونزلت راسها


وطلال في باله مرتاح , انها دخلت جو معاهم علطول , شكلها اجتماعية وحبوبة , وروحها حلوة , والحمد لله , شكلها تستحي حيل , بس تحاول انها ماتبين هالشي , بعفويتها وبرائتها تغطي على هالشي ..

عزيزة وهي تقوم من الأرض : يللا انا بروح انام , تصبحون على خير

شوق طبت على خالتها وباستها : تصبحين على خير

حلا ضحكت .

عزيزة : ياحلوك بس , تعالي حلا , انتي عندك جامعة بكرة ؟

حلا : ايه , بروح ان شاء الله

منال : يمه شوفي حلا , تبي تروح مع السواق

طلال : خير حلا ؟ تروحين مع السواق وانا موجود ؟

عزيزة : لا يابنتي , طلال يوديك مع منال بكره

حلا وهي منحرجه : لا خالتي مشكورين مابي اتعبكم .بعدين انا مو بنفس جامعة منال , مشوار عليكم

طلال : لا مشوار ولا شي , مافي روحه مع السواق لحالك

حلا طالعت طلال بعدين لفت عنه ماتبي تحط عينها في عينه : خالتي والله احرجتوني بطيبكم ماله داعي , سواقنا موجود وامي قايلة له

طلال وهو يقوم قال : خلاص حلا , بتروحين معانا , وانا اكلم السواق واقول له .. بس استعدوا ( ويلتفت على منال ) قوموا مبكر لاتطفشوني .. ترا ماحب انتظر

حلا ومنال : ان شاء الله ..


ثاني يوم الصبح , الساعة 5 ونص ..

فتحت حلا عيونها على صوت منال تصحيها : حلا , قومي يللا صارت 5 ونص ..

حلا : مابي اروح الجامعة ابي اسحب , ابي اناااااااااام

منال : على كيفك هو لعب الموضوع ’ قومي يللا البسي لا يعصب علينا طلال

حلا وخرت اللحاف عنها ومازالت منسدحة ماودها تقوم : شوق .. صحت ؟

منال : لا لسّه

حلا : طيب خلاص لا تصحينها , ابي اروح وهي مازالت نايمة , الحين تشوفني وتتعلق فيني ..

منال : طيب , قومي يللا من السرير .

سحبت نفسها من السرير , وراحت الحمام , شالت عبايتها ولفت الطرحة وطلعت من الغرفة ..

حلا راحت الصالة : خالتي , منال

طلال من الجهة الثانية في الصالة : هلا , تعالي , بغيتي شي ؟

حلا بحيا وهي واقفه عند الباب : بغيت خالتي ,

طلال : روحي لها الغرفة

حلا ورّدت خدودها : لا خلاص

طلال : تعالي , مستحية تدخلين لها ؟

حلا ابتسمت : لا خلاص ماله داعي ..!

ترك طلال المجلة اللي بيده , وقام من طوله وراح وقف عند حلا ..

: لا تستحين حنا اهلك , قولي شبيغيتي ؟

حلا باحراج لان طلال ماكان قريب منها مره , بس مافي الا هم لحالهم : لا بس يعني .. ابي اعرف وين المكوى , ثيابي ماكويتهم ..

طلال ابتسم , وطلع من الصالة وطل من الدرج : جميله .. جميلة تعالي فوق

حلا , روحي جيبي ملابسك

حلا ببراءه : ليه ؟

طلال : جيبيهم بس

راحت حلا جابت بلوزتها وتنورتها

طلال مد ايده بحركه تعني ( عطيني) , وخذ الملابس وعطاهم جميله الخدامه

وقال وهو يأشر على حلا : جميله , هذي حلا she is my cosint , أي شي تبغاه سوي لها اياه , اكوي هذي الملابس بتطلع الحين .

جميلة : اوكي ..

التفت عليها بدون مايطالعها لانه حس انها مستحيه : شفتي ؟ كلنا اهل , واي شي تبينه لاتترددين ..

حلا استحت ومشت

راحت لغرفتها , وشوي الا طقت منال الباب ودخلت : حلا تعالي غرفتي نحوس بخششنا مع بعض

حلا بحماس : يللا جايه

راحت حلا عند منال وقعدوا يصلحون شعورهم ,

منال تحب تحط في الجامعة فاونديشن وكحل واحيانا روج , وتلبس اكسسوارات كثيره

حلا بسيطة , تحط فاونديشن وكحل , وبس جلوس , وتلبس اكسسوار قليل , عقد او حلق بس .. !

ضبطوا اشكالهم , والاخت الخدامة تكوي على راحتها

حلا : خالتي صحت ؟

منال : ايه بالصالة

حلا : تعالي معي ابي اسلم عليها

منال : يللا امشي ,

دخلوا الصالة وكانت عزيزة جالسة على الكنبة وطلال جالس جمبها , ويطالعون تلفزيون

منال : عليكم رواقه , تلفزيون من الصبح !

طلال : اخبار ..

منال : اها

تقدمت حلا وسلمت على خالتها : صباح الخير , شلونك خالتي

عزيزة : هلا حبيبتي تعالي , ها تجهزتوا للجامعة ؟

منال : ايه , بس جميلة لسى ماخلصت كوي , باقي بس نلبس

عزيزة : وش عندها ذي والله لو انها تكوي على البخار

طلال يضحك : خليني اروح اصرخ عليها يمكن تخاف

عزيزة : لا لاتخوّف الحرمة , اسمع صوت في الدرج اكيد هي

طلال : طيب بقوم ابدل انا , ( ويأشر على حلا ومنال ) انتظروني في الصالة تحت ..

طلال وهو طالع كانت الخدامة داخلة الصالة وماسكة الملابس بيدها , وكانت بلوزة حلا اول وحده ..

طلال بطبيعته المزوحية , مسك طرف البلوزة بيده والتفت وقال : يا قلبو , هذي شارينها من adams(محل اطفال) ؟

الكل ضحك ,

حلا قالت : طلال يادبّ ترى شاريتها من زارا

طلال يطلع لسانه : أي صح زارا فيه قسم اطفال

منال ماتت من الضحك : حلا شيلي ملابسك عنه ترا والله يقعد لين بكره وهو يضحك عليهم !

حلا راحت عند الخدامة وخذت ملابسها من الخدامة وقالت وهي تبتسم :thank you so much

طلال ابتسم وراح وهو في باله , ياحليلها , بزر بس ذوق ماشاء الله عليها ,,

منال مازالت تضحك على حلا

حلا وهي لابسة البلوزة : حرام عليكم والله مو صغيره , هذا نسائي مقاس small

منال : ماعليك منه , هو متعود على ملابسي استغرب من ملابسك

( منال طويله وعريضة .. مملوحة وفيها شبه من طلال شوي , بس تحب تلبس ملابس واسعة شوي وستايلها سبورات بعكس حلا )

حلا : حليلكم انتو الأثنين , يللا امشي ننزل الحين يعصب علينا ..

نزلوا منال وحلا للصالة وركبوا السيارة وراحوا للجامعة .. طلال وصل حلا اول بعدين منال , عشان ماتحس حلا باحراج لا صارت معاه بلحالها ..

وهذا الشي كانت امه موصيته عليه بعد

دخلت حلا الجامعة , فصخت عبايتها وضبطت نفسها ومشت للمبنى الي فيه محاضرتها

وهي تمشي , كانت تتذكر كلام طلال لها في السيارة ,,

هي عادة تتضايق , بس ماتدري ليه ماكانت متضايقة , كانت مرتاحة شوي ..

قطع تفكيرها صوت غدير : الوووو وين سرحانه

حلا : لا ولا شي ..

غدير : كيفك معاهم ان شاء الله مرتاحة .؟

حلا : ايه الحمد لله .. ارتحت لهم , ودخلت جو معاهم على طول

غدير : الحمد لله

حلا تكمل كلامها وهي تجلس على الكراسي اللي جمب الكافتيريا : تخيلي , علي اجي مع السواق اليوم , وصلني طلال مع منال

غدير : ياحليلهم , شكلهم طيبين

حلا : تخيلي وش قال لي طلال بالسيارة اول ماركبت ؟

غدير : وش قال ؟

حلا : كان متردد بس طالعني من المراية وقال : حلا غطي وجهك , سيارتي تظليلها خفيف

غدير باستغراب : من اولها قام يتحكم , وش دخله هو ماعليك منه ؟

..... : بالعكس , والله حسيت انهم حرصانين علي , وتصرفاتهم تثبت هالشي , شوفي انا لسه ماصار لي الا يوم واحد معاهم , والحمد لله مرتاحه , مره محرجيني بطيبتهم وذوقهم .

....... : الله لايغير عليكم , وش عندك محاضرة الحين ؟

....... : نجم ( انجليزي ) وانتي .؟

....... : انا ماعندي الحين , الساعة 10 , الا تعالي وشخبار ابوك ؟

....... : الحمد لله , كلمت امي امس بالليل , وبس اطلع من المحاضرة برجع ادق عليها بس الحين مبكر ..

.....: اوكي اشوفك وقت الصلاة , سلام

...... : يللا مع السلامة

كان يوم ممل وطويييل في الجامعة , رجعت حلا لبيت خالتها , سلمت وطلعت غرفتها ..

بدلت ملابسها ورمت نفسها على السرير من التعب واللّف والدوران في الجامعة وراحت في سابع نومه

قرب الوقت على المغرب

عزيزة : صحت حلا ؟

منال : لا يمه لسّه

..... : طيب صحوها تراها ماتغدت

طلال : يمه خليها على راحتها متى ماقامت اكيد بتجي تاكل

شوق : لا انا بووح اصحيها , ( وركضت للغرفة , وطبت فوق حلا )

حلا قومي , قومي الحين واح النوو وجا الظلام

حلا : اوووو شوق ياحلوه روحي العبي ابي انام

شوق : لأ , مابي ابيك تقومين

حلا عركت عيونها وابتسمت لشوق : دبه ! كم الساعة ؟

شوق تطالع ساعة الجدار : الساعة 17

حلا تضحك : وانا أسألك عاد انتي وش دراك , هههههه يللا قومي انزلي تحت هذاني بنزل

شوق تحط يدها تحت المخده : الدبدوب قام ؟

حلا مسكت دبدوبها اللي لونه وردي : ايه قام ويبي يتروش

..... : تيب , بلوح اخليه يتلوّش , انتي تعالي تحت

قامت حلا وراحت تحت في الصالة

عزيزة : هلا بنتي زين صحيتي , تونا حاطين الشاهي بنشرب

حلا ببراءة : ياسلام , شاهي ,,

عزيزة : زين انك تحبينه , بس ماتبين غدا اول ؟

..... : لا مشكورة , تغديت بالجامعة

...... : طيب يللا نروح برا

( عزيزة وعيالها متعودين يشربون الشاهي برا بالحوش .. كان مره مرتب والجو يساعد على الروقان )

جلست عزيزة على احد الكراسي البيضا اللي بالحوش , وحطت حلا الشاهي على الطاولة , وجات جلست جمب خالتها

حلا : ماشاء الله , خالتي حلو بيتكم ..

عزيزة : تحلى ايامك يابعد عمري والله عيونك الحلوة

حلا : والله خالتي مره عاجبني الجو والديكور هنا

عزيزة : هذا انا مسويته هنا , نحب نجلس هنا انا والعيال نشرب شاهي ونسولف

حلا : الّا وينهم ؟

عزيزة : شوي ويجون

حلا : طيب , بس بروح اجيب شوق تلاقينها حاست المطبخ عليكم

عزيزة تضحك : ههههههه خليها الخدامة معاها .

حلا : لا خالتي معليه اجيبها تحت عيني ع الأقل , بعد شغالتكم تغسل المواعين .

توها حلا بتقوم ولا منال طالعة لهم وشوق بيدها ..


في بيت غدير ..

ام غدير : قومي يابنتي بسك نوم

غدير : اووووو يما خلوني نايمة مابي اقوم

ام غدير : يما قومي صار المغرب , بعدين فيصل دق 3 مرات

غدير : اوووه وش يبي ذا والله ماني فاضية له قوله نايمه

ام غدير : وشلون وش يبغى , خطيبك يعني اكيد يبي يسألك عن شي

غدير لفت جهة امها : ومن قال لكم اني راضية اكلمة قبل الملكة ؟

ام غدير : ماقال يبي يكلمك , هو عارف انك مارح ترضين , نبي نتفق معاك على الملكة

غدير : يمه , انا قلت مابي اتزوج , توني باولى جامعة منتم صاحين ! قلنا نمشيها خطبة وقلتوا اوكي , والحين تبون الملكة قريب ..

ام غدير : أي مافيها شي , خير البر عاجله

........ : مصحيني من نومي عشان تقولون هالكلام , انا قايله لكم ماقدر اوفق بين الزواج والدراسة

....... : الا تقدرين , وانتي ماشاء الله شاطرة , وابوك مانبغاك تزعلينه

....... : ياربي انتو وش اللي غير رايكم ؟

....... : فيصل جايه نقل لمستشفى في الدمام , واذا كنتي موافقة , تتزوجون وتسافرون

غدير باستغراب .... : شكلكم جايين تقولون لي ان الموضوع مغلق , مو جايين تاخذون رايي

ام غدير : اوووووووه , قومي روحي لابوك قولي له هالكلام , لأن شكله بيعطي الرجال الموافقة

نطت غدير من فراشها عشان تلحق تقول لابوها ..

راحت لغرفة ابوها لقته طالع , رجعت غرفتها ..

تفكر في فيصل ..

الجزء الثالث ..

حلا ومنال جالسين على الكراسي اللي بحديقة البيت الصغيرة وفارشين كتبهم ودفاترهم يكتبون ويلخصون

حلا تستهبل : 12 في 2 كم ؟

منال بعد تفكير : 16

حلا : ماشاء الله عليك , حافظه جدول الضرب

طلال طالع من باب الصالة , ومتقدم عندهم : 24

منال : جاك هذا العبقري عاد ..

حلا باستهبال : صح عليك

طلال جا وقف عندهم : وش عندكم تدرسون ؟ ممكن اجلس معكم ؟

منال : طبعا نتنمنّى ..

حلا : تعال اجلس

سحب طلال الكرسي اللي مقابلهم ثنتينهم , وجلس .. قال وهو يطالع في الحوسة الي على الطاولة : اف , شكله عندكم برزنتيشن (بحث) ولا شي

حلا : ايه استغفر الله , بكره لازم اسلم تقرير فيزياء .. انحولت وانا قاعدة ارسم رسم بياني

منال : انا ماعندي شي , بس قاعده اترجم قصيدة بالانجليزي ..

حلا : يوووه الله يعينك

طلال : ليه ماتحبين الانجلش ؟

حلا : عادي , بس غثيث شوي , حتى حنا اول ندرس فيزياء وكيمياء بالعربي , والحين بالانجليزي , والقوانين تختلف شوي

منال : انا خليني بعيدة عن التفكير , احفظ واكتب احسن , ليه اقعد افرّ راسي واحوس مخي عشان احل مسأله

حلا وهي تضحك وتطالع منال : تكفين الدكتوره معطتنا مسأله نحلها من السبت , وعجزت منها

طلال وهي يبتسم : عطيني اياها اشوف ..

حلا : شلون يعني ؟

طلال يمد يده : يعني عطيني اياها يمكن اعرف احلّها ..

حلا بفرح مدت له دفترها وقلم رصاص : شوف

خذ الدفتر طلال وطالع فيه شوي بعدين قال : ايه هذي سهله , شوفي ( وقرب كرسيّه شوي منها ) ومد الدفتر لقدام وقال : اول شي تضربين هذولي مع بعض ..

بعدين تجمعين عليهم العدد ...... الخ

منال : تف تف عليك لا اله الا الله , اظاهر انت ماتمسح شي من ذاكرتك , للحين متذكر مقرر 101 ؟

طلال ابتسم وقال : الحمد لله , الحين استفدنا منه ..

حلا ببراءه رفعن راسها له وقالت : انت تخصصك فيزياء ؟

طلال : لا .. انا صيدله ..

حلا : اممم ماشاء الله . الله يعينك على الكيمياء وغثى الكيمياء , وع

طلال : بالعكس حلو , هو صح يلخبط شوي بس اصرف من الفيزياء معقد ..

منال : حسيت اني كرسي جالس , وانتوا تتفلسفون , انتي الحين ماحددتي تخصص لسه ؟

حلا : لا مو الحين , السنه الجايه

طلال : وش ناويه تدخلين ؟

..... : يمكن احول حاسب , او يمكن ادخل علم احياء

..... : اها , الله يوفقك ان شاء الله

( يقطع عليهم صوت جوال حلا وهو يدق على نغمة غدير ......)
حلا : هلا ياحلوه كيفك ؟

غدير : انا تمام الحمد لله , عندك احد ؟.

حلا : قاعده مع خالتي وعيالها , ..

غدير : طب قومي شوي عنهم بغيتك بسالفه ضروري

حلا : اوكيه لحظه ( والتفتت على منال وطلال وقالت ) : دقيقة بس صديقتي على التلفون

منال : خذي راحتك وسلمي عليها

طلال يستهبل : سلام كثيييير ..

حلا طالعت في وهي فيها الضحكه عارفه انه يمزح : اوكي , شوي وجايه ..

هلا غدير , يللا قولي

....... : معليش قومتك من عندهم ..

....... : لا عاااادي , تراني حولهم بس اتمشى قريب منهم .. يللا قولي

...... : تخيلي اليوم اتصل علي فيصل !

........ : احلفي , وش يبغى ؟

......... (قالت لها السالفة ) : والحين مادري محتاره ارفض ولا أوافق ..

حلا تسولف مع غدير وصوتها مسموع شوي , وطبعاً سوالفها كلها عند طلال اللي قاط اذانه

حلا : حرام عليك , طبعا وافقي , شكله الرجال ميّت عليك , ليه ترفضين اساساً ماله سبب رفضك ..

غدير : مادري والله مترددة , يعني تتوقعين يمديني اتجهز كذا على العيد ؟

...... : طبعا يمديك , قسم بالله لو اني منك اوافق , ترا كلها ملكة يعني مو زواج , على الأقل ارحمي الرجال شكله مو متحمل يبعد عنك هي هي هي

....... : اوووه لا تقولين كذا ترا اصدق ..

( هنا التفتت حلا على طلال شافته يبتسم , إه .. فشله شكله سمعني )

غدير : الوووووو وين سرحتي

حلا : هاه , معاك ..

قالت غدير وهي تتربع على سريرها : انزين ماقلتي لي , طلال ولد خالتك , شلون شكله ؟

حلا : ليه تسألين ؟

غدير : كذا , ابي اعرف مين الأحلى فيصل خطيبي ولا طلال ..

حلا تضحك : تصدقين مادري .. ! ماهتمّيت ادقق في شكله ..

غدير : طب طالعيه الحين وقولي لي ...

...... : لااا استحي اطالع فيه و اخاف ينتبه

....... : طيب حلو ؟

....... : انتي ياهبله , تدرين اني ماحب افكر بهالأشياء أصلا ..

....... : طيب , نشوف , بس اذا قدرتي طالعيه عشان توصفين لي اياه

...... : طيب طيب , يللا ضفي وجهك عني بروح لهم , سوالفهم ماتنمل , اما انتي تجيبين المغص

........ : افا

....... تضحك على مزحتها : ايه ابلشتينا انتي وخطيبك , على بالك مستحيه ماتبين توافقين وانتي من داخل تناقزين من الفرحه

...... : طيب يللا روحي لهم بس الشرهه على اللي يدق عليك , بس برضو بدق عليك بالليل مره ثانيه ..

...... : اوكي يللا باي


سكرت حلا وهي تضحك وراحت عندهم , وخطفت نظرة سريعة لطلال تحاول تشوف شكله زين ..

الجزء الرابع



ابتسمت عزيزة برضا على اهتمام طلال بحلا , اللي حتى منال ماقدرت تعطيها اهتمام كثير ...

توقع طلال ان حلا قاعده بالصاله , راح هناك وشافها جالسه على الكنبه , وماسكه جوالها , تطالع تلفزيون وبالها مو معاه ..

جلس طلال على نفس الكنبه الكبيره , وقال بهدوء : الحلو ليش زعلان ؟

ابتسمت حلا ابتسامه مزيفة : لا مو زعلانه

طلال ابتسم : لا , زعلانه

حلا : لا مافيني شي , بعدين ليه يهمك تعرف ؟ خلاص قلت لك مافيني شي ( وقامت من على الكنبه )

قام طلال ووقف قبالها , تكتّف وقال : يهمني اعرف , عشان اورّيه شغله اللي يزعل بنت خالتي

حلا استحت , هي تعرف ان هذا اسلوب طلال في الكلام , هو مايقصد شي فيه , بس طريقته في الكلام حلوه , واساساً لسانه عسل مثل مايقولون

حلا باحراج : سبب بايخ اصلا مايستاهل

طلال : معليش , قولي


ترددت حلا قبل ماتتكلم , وجلست على الكنبة ..

حس انها منحرجه منه, قال وهو يتربع على الكنبه : طيب , تبين انادي لك منال تتكلمين معها ؟

حلا : لا عادي , ( وضحكت ببراءة ) بفضفض , بس الله يعينك علي تراني غثيثه ؟؟

طلال بالمصري : فضفضي ياختي فضفضي

( في الايام اللي عاشتها حلا معاهم , ارتاحت لطلال اكثر من منال , ماتدري ليه , مع انها حاسه ان طلال انتبه لهالشي بس ماحبت تبينه زياده , قالت وهي تتنهد : ماما ..

طلال : وشفيها ؟

...... : مادري , احس انها مخبيه علي أشياء ..

...... : زي ايش مثلا ؟

...... : ابوي , احيان احس ان اللي فيه اكبر من سالفة سكري وضغط , بس مافي فايده , شكلهم مغبيّين عني , مايبون يقولون لي , وجهه تعبان , غير عن اول , اول كان يرتفع وينخفض السكر عنده , اعرف شكله وحالته , مو نفس الوضع الحين , شكله فيه شي ثاني ..

بس يارب لأ , ويكون بصحة وعافية

حتى يوم راحت قالت لي بيتعالج برا , ماقالت لي بابا شاللي فيه , حسيت اني بزر , مو معطيني قيمه واهتمام , وشدعوه يعني ماأدري .. ؟

طلال : يابنت الحلال , يمكن ماحبت تقول لك , يعني شدّة وتزول , ان كان شي بسيط وسهل علاجه , يعالجونه بعدين يقولون لك ..

ويمكن بتقول لك , بس تنتظر الوقت المناسب

يعني انتي الحين لا تشيلين هم , متى آخر مره كلمتي امك ؟

حلا : اليوم , وكلمت بابا بس حسيت من صوته انه مو اوكي ! والله خايفه , حاسه ان فيه شي

طلال : حلا , اول شي امسكي دموعك ولا تصيحين , لاني ماتحمل اكلم احد كذا , وما أعرف , يتشتت تركيزي

حلا مسكت نفسها وابتسمت : وشسوي طيب ؟ يعني بالذمه طلال وش بيكون شعورك لو عرفت ان احد من اهلك مخبي عليك شي يهمّك وله علاقه فيك ؟

طلال : معاك حق , قهر صراحه , بس انتي لا تضيقين خلقك عشان هالشي , لما تتأكدين ساعتها يصير خير ..

( وابتسم ) وقال : ابتسم واضحك , ومالك وللألم ..

وازرع البسمه على صحرا الرمال ..



كانت الايام تمر بسرعة .. لين صار بكره موعد وصول منيرة وزوجها محمد , وياخذون حلا وشوق عشان يرجعون للبيت ..

حلا وهي فرحانه ومتضايقة بنفس الوقت : والله ماني عارفه وشبسوي بدونكم , تعودت عليكم ..

منال وهي تتمكيج عشان تستقبل خالتها في بيتهم : والله حتى احنا تعودنا عليك , انتي الى الآن ماكشختي ؟ امك بتجي يللا البسي

حلا : طيب , بروح الحين ..

راحت حلا لبست واستعدت ..

لبست بنطلون جنز وتي شيرت وردي عليه رسومات بالأسود , فكت شعرها , وحطت مكياج خفيف .. طلع شكلها خيال

طلال كان مارّ , وشاف انعكاس حلا بمرايتها , لانها ما كانت مسكره الباب بالكامل ..

علطول راح غرفته , وحمد ربه انها ماكانت منتبهه ..

بس هذي اول مره يشوفها بدون عبايه وحجاب من اول ماجات عندهم ..

مذهله !
ماهي بس قصة حسن
رغم ان الحسن فيها بحد ذاته مشكلة

مذهله
كل شي فيها طبيعي ومو طبيعي
اجمل من الأخيله ..

طلال كان يمشي وباله مع المرايه اللي انصدم منها قبل شوي ..

شكلها غير .. غير !

أحلى بكثير .. !


مع انها لمحه وحده ..!

بس قدرت حلا فيها انها تاخذ قلب طلال , وتخليه عندها ..

ويحبها كل يوم زياده عن اول .. !

اول ماعرفها وجات بيتهم , كان يعتبرها اخته , وكان كل همه انه يسعدها وترتاح معاهم ..

لاشعورياً ..... صارت حلا همّه الوحيد .. !!

وهي الكل بالكل في هذا البيت ..!

نزل طلال للدور الاول من البيت .. شافه فاضي , طلع للحديقة وكانت امه جالسه هناك ..

قال طلال وهو يحب راس امه : متى بتجي خالتي ؟

عزيزة : بعد العشاء ان شاء الله

طلال وكأنه يبي يعرف شي : اجل البنات وينهم ؟ اشوفك قاعده لحالك ؟

عزيزة : الحين ينزلون , بس يلبسون , تعرف البنات حوستهم حوسه , يستعدون لمنيرة ..

طلال : اوكي ..

شوي ويجون البنات تحت , قالت حلا وهي تكلم منال :احدي ربك انتي استغفر الله اليوم كان عندنا كيمياء عملي , بس انواع الضحك , خلص وقت المحاضره والتجربه ماسويناها , ماندري شالموضوع والله نحوس على كيفنا

منال : حمد الله ماعندنا لا كيمياء ولا خرابيط

عزيزة : ماتخافون انتم من ذا الكيمياء والمحاليل ؟

حلا وهي تجلس على الكرسي وتضحك : لا خالتي مايخوف عادي , بس المشكله روائح المركبات والأحماض تجيب الصداع

طلال : ايه في هذي صادقة

نادت عزيزة طلال , وهمست في اذانه شي وابتسمت

طلال : تعالي حلا في شي نبغاك تشوفينه

حلا : وشو ؟

عزيزة : انتي روحي وتشوفين

طلال : تجون ؟

منال : ايه بس دقيقه

عزيزة : روحوا وحنا نلحقكم ..


( كانت عزيزة ملاحظه اهتمام طلال بحلا , وارتياح حلا لطلال .. طبعاً اعتبرته شي عادي , لانها عارفه ان في حدود بينهم ..

بعدين جات في بالها فكره , انها تقوّي العاقه بين طلال وحلا , يمكن تعجبه ويرضى يتزوجها , ولا اول يوم كانوا خاطبينها له , ماكان راضي لا فيها ولا باي احد ثاني .. )


مشى طلال مع حلا , وكانت تمشي وراه , قال طلال وهو يلتفت : ماحب احد يمشي وراي , خليك قدامي ..

حلا : ماحب احد يمشي وراي , خلك قدامي ..

ضحك طلال على هبال البنت ...

قالت حلا باستغراب : انت وين بتوديني ؟ ( كانوا ماشين جهة الحديقة الخلفية اللي بالبيت , وهذا المكان ماقد راحت له حلا من اول ماجات عندهم )

طلال بخبث وهو يفتح باب غرفة خلفية : احب اربي فيران واسوي عليهم تجارب , تعالي شوفيهم

حلا بخوف وهي ترجع على ورا : لأ , منت صاحي تبيني ادخل ؟

........ : طبعا , ابيك تشوفين اشكالهم يجننون ..

........ : وع مابي رح انت

طلال ضحك : معاك , شوفي ( دخل وشغل اللمبة .. وكانت حلا واقفة عند الباب .. )

كان يضحك على وجه حلا وهي مستغربه من اللي شافته ..

كان معمل كيمياء صغييييير .. حق طلال .. لان تخصصه صيدله ..

قال طلال وهو يأشر بيده : مافي فيران , تعالي

حلا بعد تردد دخلت , قال طلال وهو يحوس بالدواليب : تبين تجربين .؟

حلا ببراءة هزت راسها وقالت : ممكن ؟

طلال بابتسامه تدوّخ : طبعا حنا جايبينك هنا عشان تجربين

حست حلا بفرحة مو طبيعية , مهما شكرت طلال واهله , ماتوفيهم حقهم ..

حطت يدينها على الطاوله وجلست تتأمل في الأشياء ..

قال طلال وهو يبتسم : كاشخين اليوم !

حلا ابتسمت بس مافهمت : نعم ؟

أشر طلال على جفنه وقال : الشدو , من جيتي ماشفناك تحطين .. حلو !

حلا طاح وجهها من الحيا وماردت عليه , اما هو اكتفى بابتسامة ..

الجزء السادس ..

وجه حلا كان خالي من أي تعابير .. غير انها نزلت راسها ومانطقت بكلمة ..

طلال كان يشرب العصير .. وجّه نظراته لأمه وابتسم , بس كانت ابتسامه مانتبهت لها حلا , لان شفايفه كانت مازالت على الكاس , وهو مارفع الكاس عن وجهه , وظل يشرب ..

قالت منيرة وهي تبتسم : موضوع سابق لأوانه , نفكر ونرد عليكم ( وغمزت لعزيزة )

حط طلال العصير على الطاولة , وقال لما شاف حلا بينفجر وجهها من حمرته : يللا يمه , مشينا ؟

ضحكت عزيزة على حلا وسلمت وطلعوا ..

سكرت حلا الباب وراهم وقفلته بقوه خلت امها تضحك عليها . قالت منيرة وهي تمسك نفسها من الضحك :

وشفيك حلا ترا ماقلنا شي غلط .!

...... : نعم ! وش غلط قسم بالله فشله , كذا علطول يللا لصّقوني بالرجال .. ما أحب هالأسلوب

...... : هي قالتها بس كذا , بس يوم فكرت فيها , قلت ليه لا ! ,

خلاص طيب لاتعصبين علينا اعتبريها تمزح

...... : حتى لو تمزح , تقول قدامه كيفها , او قدامي كيفها , بس مو وحنّا مع بعض ,

...... : حلا تراك مكبره الموضوع , ماتبينه خلاص عادي مارح نغصبك عليه .. !

......: من جدكم انتوا ؟ توّك تقولين نمزح ..!

...... : اقول حلا , شيلي الصينية لو سمحتي وروحي بدلي لشوق اختك وخليها تنام , ومدام ان حنّا ازعجناك بالموضوع , خلاض فكري فيه بعدين .!

شالت حلا الصينية وحطتها بالمطبخ ورقت فوق علطول وفيها الصيحة من الاحراج ..

رمت نفسها على السرير ..

قمة الاحراج ..!

الله يهديهم ذا الكبار مايهمهم احد ..

لا وتقول لي قدامه ..!

المشكلة اني ماقدرت حتى اشوف تعابير وجهه ووش ردة فعلة ..

يالله احس اني مالي وجه فيه ..

ماقدرت اطالعه حتى ..

بغيت اطلع من المجلس بكبره .. !!

اعوذ بالله على هالسوالف ما أحبهاااااااااا ..


وفي السيارة .. انفتح نفس الموضوع مع طلال

قالت منال الملقوفه : ها طلال ماقلت لنا وش رايك تبغى البنت ولا لا ؟

طلال رفع راسه على منال من مراية السيارة بس ماردّ عليها

عزيزة : أي ياولدي وهي الصادقه وشفيها حلا والله ان مافي مثلها وتناسب لك

قال طلال : يمه ..! الحين انا قلت لكم بتزوج ؟ انا خلصت دراستي اصلا ..؟

...... : لا ياولدي ماقلت .. بس انت باقي لك ترم او سنه بالكثير وتتخرج ان شاء الله .. احنا مانقول لك تزوجها الحين .. على الاقل نخطبها .. عشان ماتروح البنت مننا

يعني بنت اختي واعرفها , صح ماكانت علاقتنا فيها قويه بس انت بنفسك شفت , شهرين مدري ثلاثه من جات عندنا وكأنها وحده مننا , وانا ملاحظه على معاملتك لها مره حلوه , ومو مقصر عليها بشي ..

قال طلال بعد ما أخذ نفس طويل : طيب , لما اهتم فيها واسأل عنها واعاملها اوكيه , معناها اني ابغاها ؟

منال : لا . بس ماقلت ماتبغاها ..!

طلال : قفلوا الموضوع بليز مو وقته .. اصلا انا تشغلني دراستي ماني فاضي لشي ثاني .. وطول ماهي بنت خالتي وحسبة اختي بظل اهتم فيها واحرص عليها وأسأل عنها , انتي تعرفين ان خالتي الله يهديها مخليتها على راحتها , وابوها تعبان هالفترة ..

وفتح طلال موضوع ثااني تهرباً من الموضوع هذا ..






الايام تمر .. وطلال يروح ويجي على بالي .. مو عشان الكلام اللي قالته خالتي عزيزة ..

كل فترة وفترة تتصل علي منال , وتسألني ان كنت ابي شي ...

حلا طلال يقول لك بيروح المكتبة تبين شي منها ..؟

حلا , انا وطلال بنروح السوق توصين شي ..

حلا , اكيد مو محتاجه تروحين مكان او تشترين شي ..؟

مع ان عندي سواق واقدر اطلع بس الفترة الاخيرة عشان ابوي تعبان , ماقدرت اطلع , والصراحة استحيت اقول لهم ..

بس طلال بنفسه قال لمنال وخالتي خلينا نطلع نتمشى وناخذها معانا ..

رحت لابوي استأذنه , وبالموت وافق , مدري ليه ..

وامي حسيتها بعد مو راضيه مره , بس وافقت ..

صراحه طفشت من البيت ..!


وكانت طلعتنا , احلى طلعة , وكانت احلى مره اروح فيها لصحارى مول .. ليه مادري ..!

خاصة ان شوق ماكانت معانا , وخليتها عند امي , ارتاح من مسؤليتها والمراكض وراها في كل مكان ..

بس من جد .. حياتي معاهم . غير ..

وتعاملهم معاي وطيبتهم ..

بس مدري هل لان انا كاسرة خاطرهم , ولا وش القصه ..؟

المهم , شريت اكسسوارات لفستان ملكة غدير ,, واللي بعد يومين ان شاء الله ..

ياعمري غدير .. حالتها حاله .. خليني اكلمها واتطمن عليها

........ : الووووووو غدير يالشينة وينك

.......... بصوت نايم : هلا والله

....... : انتي نايمه من جدك , الساعه 8 بالليل ترى

......... : تكفين اسكتي , ترا بالموت انام هالايام ..

.........: ههههههههههههههههههههههههههههههههههههههههه الله يعينك على ما بلاك , انتي اللي تبين فيصل وتبين الزواج .. تحملي

........ : والله لو انك حولي كان مايردني الا جوالي في جبهتك , يللا .... قفلي الخط .. ابي انام

........ : ماشاء الله عليك ذوق , لا مارح اقفل وش رايك , قومي يللا بعدين تسهرين بالليل ..

قالت غدير بطفش ممزوج بشوي عصبية : الله يسلط عليك طلال ..... ويحرمك من النوم .... مثل ماحرمني فصيل منه

........ : لااااااااااااااااااااااااااااااااااااااااااااااااا ااااااااا استغفري ربك , خلاص والله بقفّل الخط روحي نامي للصبح مابي منك شي , يللا مع السلامه مع السلامه ...


صاحية ذي ؟ وش فيهم علي يبغوني اتزوج غصب .. ؟

وااااي ياحبني لك تتعبين بتنزيل القصص بس والله كل وحده اروع من الثانيه

مشكوره امول ع الرد وتعبكم راحه

الجزء الثامن ..

ماتحركت حلا من مكانها ..

طلال قام وقال وهو بعيد شوي : وش فيك انتي ؟ ترا ماقصدت شي .. بس كنت بشكرك ..

حلا بعفوية : على ايش..؟

..... :على انك سألتي عني .. ! ( ويبتسم) ماتوقعتك تهتمين لنا ... قلت البنت شكلها ناسية بيت خالتها

حلا انحرجت وماعرفت شتقول : لا عادي .. مو مشكله ..!

وقالت في نفسها (وش ذا الرد الغبي ؟)

..... قال بعد ماضحك على ردها : يعني حلاتنا كذا .. كلنا اهل والمفروض قلوبنا على بعض ..

..... : ...... (سكتت وفي بالها .. يحق له طلال يعاتبها .. يعني كل الايام اللي عاشتها معاهم ,, وكل الأشياء اللي عملوها لها .. تستاهل انها تسأل عنهم وتسلم عليهم .. خاصة طلال اللي كان يخليها مو محتاجة لشي .. )

ابتسم بدون مايطالعها وهو فيه الضحكه على حياها .. مع انه مامدحها او قال لها شي غلط يعني ..

ضحك وقال بمزح :وشفيك انتي الحين مستحية ..؟ اذا انا قلت هالكلام .. ضاعت علومك .. ! احمدي ربك اني انسان محترم وماحب اتجاوز حدودي ..

حلا : لا تكفى تجاوزها .. عشان عند امي ..

اطلق طلال ضحكه قويه خلت منال تقطع سالفتها وتلتتفت عليها

حلا : وش اللي يضحك ؟

طلال يمسك بطنه : بزر .. والله بزر .. وش اللي بتعلمين امك ؟ بتطقّني يعني ؟

حلا بعصبية : اوووه انت خلاص لاتضحك , منال سكري التلفون وسولفي معي ترا هالشين ابلشني

طلال يعض شفايفه : انا شين ؟ ( ويمسك مخدة الكنبة ويسوي نفسه كأنه بيرميها عليها )

حلا خافت ووخرت ومات هو من الضحك

حلا : منال ترا بروح غرفتك كيفي امون عليك

طلال يقلد صوت حلا الناعم ويحرك راسه : منال ترى بروح غرفتك كيفي امون عليك

حلا رفعت حواجبها وضحكت عليه : يمه وانا اقول من وين جا صدى صوتي (وفي بالها : هالصوت الناعم طلع من كهف الجبل اللي اسمه طلال )

دخلت شوق تركض : طلال جوالك يرنّ في الصالة

طلال قام : طيب بخليكم على راحتكم

حلا تستهبل : لا ! تو الناس .. اقعد بعد زياده ..!

طلال : ترا اقعد والله ..!

حلا : لا لا روح تكفى , ابي اشيل طرحتي متّ من الحر !

..... : بتشيلينها ؟ ابي اشوف ..!

وضحك قبل ماتردّ عليه

قالت حلا وهي منزله راسها تضحك : يللا بس روح الحق على جوالك قبل لايقطع

...... : واذا قطع وش فيها ؟

...... : مافيها شي .. ........ خلاص اجلس هذا بيتكم .. انا بروح غرفة منال ( وتأشر لمنال )

طلال : لا بطلع خذوا راحتكم .. بس حبيت اهبل فيك شوي

...... : شوي ؟

..... : لا كثير .. هه هه هه

......... ضحكت : بايخه

.... :

......: تفضل من غير مطرود (وتضحك)

...... : ان شاء الله ابله حلا على هالخشم (ويحط اصبعه على خشمه)

ويطلع ويسكر الباب وراه ..

والتفتت حلا على منال اللي ماخلصت تلفون

سكرت منال بعد فترة وجلسوا يسولفون

منال : حلا فاتك اليوم

..... : وشو ؟

..... : واحد يجنن في المستشفى

..... : والله انك بايخة , انا ماخلصت من غدير تجيني انتي .. وش دخلك بالناس لاتقعدين تطالعينهم

..... : تكفين بس ارحميني انتي اللي عيونك بالأرض ..!

..... : لا مو بالأرض بس ما أتعمد اطالع على الاقل

..... : طيب .. خليني اكمل لك السالفه

..... : اوكي .. يللا كملي

..... : تخيلي شكله يعرف شوق اختك


..... : يعرفها ؟ ومن وين ان شاء الله ؟

..... : مدري انا كنت طالعه من غرفة طلال الظهر .. وكان هو واقف بعيد شوي .. وكانت شوق معي شافته وراحت تركض له ..

يوم سألتها مين هذا قالت لي مشاري , بس مين مشاري ما أعرف..


حلا : أها ... اظن هذا السكيورتي ,, أي مستشفى اللي كنتوا فيه ..

..... : نفس اللي كان ابوك فيه اول مره

..... : ايه عرفته ( وقالت لها السالفه )

منال : بس والله انه يجنن

..... : قولي ماشاء الله

..... : ماشاء الله , ودي امرض ولا اطيح بالمستشفى عشان اشوفه ..!

...... : الحمد لله الذي عافانا مما ابتلاهم به وفضلنا على كثير من خلقه..

..... : ليه تتحمدين علي ؟

..... : تبين تمرضين عشان تشوفينه ؟

.... : ايه .. الحب وما يسوي

..... : أي حب أي بطيخ .. ماصار لك حتى نص يوم من شفتيه تقولين لي حب , روحي قشري بصل بس .. (تستهبل) انتي تعرفين الحب انتي ؟

بخبث : لأ .. ما أعرف .. علميني

..... : من وين اعلمك مابغيتي الا انا ..!

..... : لا ! علينا هالكلام ..؟ وحبّ اخوي هالمزيون وين راح ؟

...... : انتي من قال لك اني احب اخوك ؟

...... : تحبينه ..

..... : لأ ما أحبه

..... تمد راسها لقدام وتقول باصرار : كذذذذذذذذذذذذابه

...... : انتي من جدك أي واحد يسولف معي ويعاملني كويس اروح احبّه .. خير ؟

....... : طيب احلفي انك ماتحبينه

...... : مو زين الواحد يحلف على أي شي

....... : يعني تحبينه ..؟

....... باصرار : لأ ..

....... : مو مشكله , يجي الحب بعد الزواج ..

.......طيّرت عيونها وهي تضحك من كلام منال : انتي وش تبين غصب اتزوج اخوك ..؟

...... : اصلا اذا مازوجوكم خالتي وامي , انا اللي بزوجكم ,, وانا اللي اذكر امي دايم بالموضوع

...... : وجع ! ليه طيب مين قال لك اني موافقه .. ؟

...... : انتي تكابرين اصلا , ومستحيه تقولين موافقه

..... : لأ ما أكابر , وماني موافقه صدق ..

..... : طيب .. افترضي اني صدقتك .. ليه منتي موافقه ؟

ارتبكت حلا من السؤال وقالت وهي تحاول تصرّف : كذا .. احب احتفظ بالسبب لنفسي .. ايه صح منال .. ابغى اسمع سالفة البنات اللي تهاوشتي معاهم ماقلتيها بالتفصيل .. يللا قولي

طفشت منال وهي تحاول تسحب حلا بالكلام , وسكرت موضوع طلال وقامت تتكلم عن البنات ..

في نفس الوقت في غرفة طلال

اتصل طلال على الرقم الغريب اللي وصل منه missed call

طلال : الو مرحبا

....... : مراحب , كيفك طلال ان شاء الله تمام ؟؟

طلال : عفواً مين معي ؟

....... : مشاري الفلاني ..

....... : اوه مشاري معليه آسف ماعرفت رقمك

....... : ايه انا غيّرته قبل يومين

....... : اها , وشخبارك ياشيخ من زمان عنك

...... : تمام الحمد لله والله , حمد الله على سلامتك

استغرب طلال , مين قال له ؟ : الله يسلمك , بس انت كيف عرفت ؟

...... : انا اشتغل بنفس المستشفى اللي كنت انت فيه اليوم , ومعليش اعذرني والله مادريت الا من واحد يقال له محمد , تعرفه ؟

..... : ايه اعرفه ( محمد زوج منيرة )

..... : لا بس شفته جاي عند الرسبشنست وانا خلاص بطلع , وسمعته يقول اسمك , وقلت اتطمن عليك

...... : الله يسلمك ماتقصر ..

...... : طيب انا اخليك الحين , فمان الله

...... : فمان الكريم

( مشاري اكبر من طلال بسنتين .. تخرج واشتغل في المستشفى .. وكانوا يعرفون بعض من ايام الجامعه .. )

سكر منه طلال وهو مستغرب .. كيف ماشافه في المستشفى قبل ما يطلع ؟ يمكن كان دوامه مخلص ..


في بيت غدير .:

ابو غدير وهو يصعد الدرج : وين غدير ؟

ام غدير : في غرفتها تدرس

ابو غدير : روحي ناديها ابغاها , خليها تجي الغرفه

ام غدير : طيب

راحت ام غدير نادتها وراحت غرفة ابوها

غدير : سمّ يبه

ابو غدير : غدير انتي كنتي تذاكرين في المجلس امس ؟

...... : لا , من زمان ماذاكرت فيه ..

...... : طيب , في كتاب لونه ازرق حطيته بالمجلس امس واليوم ماشفته .. انتي ماخذته ؟

...... : لا يبه , ماخذت شي , تبغى انزل ادوّر لك اياه ..؟

...... : ايه ابغاه ضروري

....... : ان شاء الله الحين انزل

وهذا الجزء التاسع

ركضوا منيرة وعزيزة على حلا اللي كانت ممدّه على الارض ..

ومنال وشوق جاو يركضون من فوق .. على صوت الصراخ اللي طلع من الصالة ..

قالت عزيزة : حلا .. حلا قومي .. قومي

منيرة بعصبية : جيبوا جوالي بتصل على محمد

عزيزة : محمد مو فاضي لك ,..... منال قومي اتصلي على اخوك خليه يجي بسرعة .. بسرعه قومي

قامت منال تركض لجوالها , ومن ربكتها وخوفها نست رقم اخوها .. ونست هي وش مسمّيته في الجوال .. بعد ثواني اتصلت عليه .. وقالت بصوت مرتعب : طلال .. تعال بسرعه .. بسرعه

طلال بخوف : منال وش فيك ؟

منال : طلال تعال بسرعة حلا اغمى عليها .. طلال بسرعة تكفى , محمد مو موجود

سكر طلال منها وداس على البنزين بأقصى سرعة .. ودخل بين الأحياء عشان يوصل بأكبر سرعة ممكنه ..

كان يحاول انه يسيطر على خوفه على البنت .. وصوت منال خوفه زياده ..

ومنال كانت كل شوي تتصل تستعجله .. بس ماكان يرد عليها ..لانه مايبيها تربكه اكثر ..

وكلها ثواني ووصل عند بيت خالته .. وحرق الجرس من كثر مادقّ عليه مرات ورا بعض ..

فتحت له منال وهي تصيح وتسحبه من يدينه للصاله ..

دخل وكانوا عزيزة ومنيرة جالسين على الارض يصيحون .. وشوق واقفه وبكل خوف تتأمل الموقف ..!


قال بعصبية واعصاب مشدودة : شيلوها عن القزاز .. بسرعة .!

انتوا ماتصرفتوا ؟

شوق حطت راسها عند حلا ,, وقالت باندهاش : ماما .. حلا ما تتنفس ..!

صرخ طلال : عطر .. جيبوا عطر .. بسرعة ..!

استوعبت عزيزة وركضت لشنطتها تجيب العطر .. ووسط ربكتها مافهمت ليه العطر .. مدّته لطلال

مافي وقت طلال يشرح لها .. رشّ شوية من العطر على يده وقربها لخشمها .. ويرشّ زياده .. ومره ثالثه بعد .. شوق قامت تكح من تركيز العطر في الجو .. بس حلا ماحست ..

ومنيرة تهزّ البنت من الجهه الثانية ..

وعزيزة تكلمها .. وتعلي صوتها ..


بس مافي فايدة ..


منال بخوف : طلال قوم نودّيها المستشفى

قام طلال من على ركبتينه وقال لمنال بأعصاب مشدودة : لبّسوها عباية والبسوا بسرعة .. انا في السيارة ..

بسرعة لاتتأخرون


لف طلال بيمشي ناحية الباب , بس ركبته صقعت في شي قدامه ..

نزل راسه لتحت .. كانت شوق والدموع تنزل من عينها ..

وسط الجو المشحون بالقلق والخوف للجميع , جلس طلال على الارض وضمّ شوق ..

قال : شوق حبيبتي حلا مافيها شي الحين بنوديها المستشفى ,,

شوق كانت تصيح بدون صوت .. بس دموع تنزل على وجهها البريء ..

قال طلال بحنان : الحين بنروح المستشفى كلنا ونجلس عندها .. يللا تعالي تركبين السيارة ؟

هزت راسها شوق .. وشالها وراح للسياره .. ينتظرهم يجون ..

والقلق مبين على وجهه , رغم انه حاول يخفيه عن شوق ..

كان يحرق الطريق بسرعته .. عشان يوصل للمستشفى ..

وصل لجناح الطوارئ وبكل سرعة نزلوها .. اعصاب طلال كانت تالفه لدرجة انه ماأهتمّ يسأل وش اللي صار فيها ..

كانوا منيرة وعزيزة جمب بعض يصيحون .. وطلال يحاول يهدي من اصواتهم لانها كانت تخترق جدران المستشفى ..

منال ماكانت تستجرئ تسأل عن حلا .. هي بعد ماتدري وش الموضوع

كل ماتذكرت منظر حلا تقلق وتنزل دموعها بغزارة اكبر ..

(حلا يوم طاحت .. طاحت بقوة على رخام الصالة .. واللي كان كلة قزاز البيالات اللي متناثر هنا وهناك ..

كان الدم يغطي مناطق متفرقة من الجزء الايمن من جسمها ..

شوق كانت بحضن منيرة .. وطلال كان يمتّــــر ممر المستشفى ( يروح ويجي) ..

لما شاف حالة اهله بدت تسوء .. تذكر انه المفروض يصبرهم ويخفف من قلقهم ..

بعد ما هدت نفوسهم شوي .. وشاف طلال ان الأطباء طولوا في الغرفة اللي فيها حلا .. مسك خالته وقال : خالتي .. ان شاء الله مافيها الا الخير .. بس انتوا قولوا لي .. وش اللي سوى فيها كذا ؟ علشان اذا سألني الطبيب اعرف ارد عليه

زاد صياح منيرة لانها حست بالذنب .. فقررت عزيزة انها تتكلم ..

وقفت منال جمب اخوها تبغى تعرف الموضوع ..

قالت عزيزة السالفة بصبر , وهدوء نفس .. اما منال وطلال تلاقت عيونهم مع بعض لمدة طويلة .. استغراباً من الموقف

قالت منال بكلام مقطع : يعني حلا (وتأشر على غرفة حلا) مو بنت .. خالتي ..؟

طلال بعيون واسعة وحواجب معقودة : يمه من جدك انتي ؟ وش هالكلام ؟

عزيزة هزت راسها بالايجاب والتفتت على منيرة

قالت منال بعصبية ومن تأثير الموقف : ليه ماقلتوا لنا من اول , يوم تعلقنا فيها تقولون انها مو بنت خالتي .. يوم تعودنا عليها تقولون انها ماتقرب لنا .. ليه ماتقولون من اول , يوم صار طلال بيتزوجها تقولون هالكلام ..؟


طلال مسك منال وهو حاول يهديها : لا يامنال , هذي بنت خالتنا غصب عن الكل , حنا من عرفناها وهي بنت خالتي منيرة , ومافي شي بيتغير .. سامعتني .. انتي الحين المفروض تحسسينها بالقرب منها اكثر , مو تتخلين عنها .. فاهمة ؟؟

وخرت منال عنه وهي تحاول تمسح دموعها اللي غطت النقاب ..

طالع طلال في خالته وقال : ليه توّها تدري ؟

منيرة قالت بنفاذ صبر : مو وقت عتب , بنتي طايحة وانا السبب ..الحين اذا صار فيها شي وشلون اسامح نفسي خلاص خلوني بروحي .. خلوني بروحي

حس طلال انه قسى على خالته .. وحاول يهديها ..

كان يهدّي كل من حوله .. ونفسة ما هدت ..!


بعد دقايق طويـــــــــــــلة .. انفتح الباب وطلع الدكتور .. وتسابقت خطوات طلال عشان توصل له ..

قال الدكتور : انت ولي امرها ؟

طلال بتلقائية : ايه انا زوجها ..!

الدكتور : تفضل معي

مشى طلال ورا الدكتور .. ويحاول يبلع خوفه ...

قال طلال : ها دكتور ,, طمّني ..!

كان اليأس مبين على وجه الدكتور .. لكنه ابتسم يحاول يخفف قلق طلال وقال : وش صار لها هي ؟

طلال : تلقت خبر شين .. وطاحت على الارض ..

الدكتور : طيب وش سبب القزاز اللي بجسمها ..؟

طلال : كانت ماسكه صينية وطاحت منها , وطاحت البنت عليها .., الله يهديهم ماعرفوا كيف ينقلون لها الخبر ..

حس الدكتور ان طلال ماوده يدخل في التفاصيل .. قال وهو يطلب من طلال انه يجلس .. : شوف يا اخوي ياطلال .. كل شي بيد الله صح ؟

طلال وهو خايف : طبعاً دكتور

(تكلم الدكتور لفترة طويلة مع طلال .. طلع طلال وتوجّه لأهله ..)

منيرة بسرعة : وش فيها بنتي طلال قل لي ؟

طلال بأسى : خير ان شاء الله , تعالوا نركب السيارة واقول لكم .. ولا صار الليل ترجعون للبنت ..

حاولوا منيرة وعزيزة يقنعونه انهم يجلسون , لكنه مارضى وسبقهم عشان يضطرون ويلحقونه

ركبوا السيارة , واول ماسكرت عزيزة الباب قالت باهتمام : يللا طلال ترا اعصابنا تحترق

شغل طلال السيارة وكان سااااااكت .. وهذا الشي خلّا اللي في السيارة تتلف اعصابهم ..

بعد اصرار منهم , وقف طلال السيارة عند محل قريب , عشان يقول لهم ومايتلخبط وهو يسوق ..

قال بعد ما أخذ نفس طويل : اسمعوني .. الدكتور يقول ان حلا كانت طيحتها قوية .. ومع اثر الصدمة .. (وسكت)

منيرة : طلال كمل

طلال : حلا صار عندها مشكلة في عظمة الرجل .. واحتمال .. انها .. انها ماتقدر .. تمشي .. ...!

بعد ماقال طلال هالجملة .. خيّم الصمت على المكان من الدهشة ..

كسر الصمت صوت منال وهي تصيح .. ولحقتها شوق اللي صارت تصيح وهي في حضن منيرة

كانت منيرة ساكته لانها حاسه بالذنب

قال طلال : مايجوز تسوّون كذا , كل شي بيد الله , احسنوا الظن بالله , الله كريم ..

التفتت منال على اخوها وكانت تقول في بالها : هذا ليه حجر ..؟ حتى شكله مو ضايق خلقه على البنت ..! حتى لو مايبيها ومايحبها , على الاقل يتأثر باللي صار لها

وطلال كان مكسور من داخله .. بس مايحب يبين , كان قلبه يتقطع على بنت خالته .. هذا وهي مو زوجته وخايف عليها وخلقه ضايق .. شلون لو كانت زوجته ...

؟


رجع البيت وكلها شوي وطلبوا منه أهله يوديهم المستشفى ثاني مرة ..

كان الوقت عشاء .. والليل خيّم على الشوارع ..

وصلوا للمستشفى .. وكان طلال ينتظر برا الغرفة ..

جا محمد من جهه ثانيه في المستشفى يجر خطواته ناحية طلال ..

رفع راسه طلال .. ومدّ يده ليد محمد عشان يسلم عليه ..

محمد سحب طلال وضمه وقال : انا السبب يا طلال , بنتي انظلمت بسببي

طلال : لا تقول هالكلام , ان شاء الله بنتك بتتحسن ,,

كان طلال يتأمل في وجه محمد , اللي كان شااااحب وتعبان اكثر من اول ..

قال محمد : ابي اشوفها ..

دخل محمد الغرفة بسرعة .. وعزيزة طلعت برا وراحت عند طلال

راح عند السرير .. وبشفايف ترتجف .. حب بنته على راسها ..

صحت حلا على وجه ابوها .. ونزلت دمعتها في نفس اللحظة ..

قالت ببراءة : بابا ..

كانت بتكمل كلامها .. بس محمد قطعها وقال : خلاص يابنتي يا حلا .. ان شاء الله مافيك الا الخير .. وان شاء الله بتتحسنين .. وبترجعين تمشين .. وتراكضين في البيت بعد ..

والحين بروح وانادي الدكتور يأكّد لي هالكلام بعد ..

التفت عنها .. وكانت قبضة يده مازالت ماسكة في شرشف سريرها ..

كانت تمر عليه ذكريات حلا .. من اول مانولدت وكانت البكر .. وكانت فرحة حياته .. وبعدها بمدّه جاته شوق ..

كان يتذكر كيف كانت حلا تتدلع عليه .. وتجي تجلس بحضنه ..

وكيف كانت تلعب مع اختها بعرايسها والعابها .. وكيف كانت مسؤولة عنها وعن كل شي من الدرجة الأولى ..

كان يحب حلا يعشقها ومايقدر يستغنى عنها .. وما يقصر عليها بشي ..

كان ضميره يأنبه .. في كل مره ترفض فيها منيره انها تقول لحلا الحقيقة ..

والحين تمنى لو ان حلا ماتكون على هذا السرير ..

تمنى لو انه ما سمع كلام منيرة .. وصارح بنته ...

حسّت حلا بلحاف السرير ينسحب من يد ابوها , وبراسه يطيح على ذراعها.. !!

طلعت منيرة تصرخ ... ودخلوا طلال وعزيزة مفزوعين

صرخ طلال بكلمات متقاطعة : دكتور .. ممرضة .. أي شي .. بسرعة ..!

كان يحاول يرفع جسم محمد من على طرف السرير .. وحلا وسط خوفها وتأثرها من المشهد .. كانت تحس ان القلب اللي في صدر محمد اللي كانت تحس بنبضه على يدها .. توقف ..!

وبدون ماتنطق ولا كلمة .. او تذرف أي دمعة .. او تحرك ساكن .. كانت بس عيونها اللي تدور على خالتها وامها اللي يبكون ..

كلمات منيرة كانت قوية , وخاصة على حلا .. كانت ماسكة محمد وتقول بكل ألم : محمد قوم لاتموت ... محمد تكفى لاتخلينا .. محمـــــــــــــــــــــــــــــــــــــــــــــــ ـــــد ..!

طلال اللي كان مو مستوعب شي من اللي صار .. وقف مذهول يتأمل ,, التفت على حلا اللي كانت تبين انها منزعجه من الموقف لكنها ساكته .. ومغمضه عيونها وترص عليها بقوة .. ودموعها تنزل

منال لازقة في عزيزة ويبكون بدون صوت ..!

قالت منيرة بانفعال وصياح وهي تطالع في حلا : ابوك مات .. انتي ماتحسين ..؟ ماتنطقين حتى بكلمة ..!

قربت منيرة من راسها ومسكت حلا تهزها من كتوفها لان حلا كانت مصدومه وماتتحرك من مكانها : حلا .. اسمعيني .. ( ويعلى صوت صياحها ) ابوك راح .. راح خلاص ..

طلال سحب خالته عن حلا وقال : بس خالتي .. بس ..!

دخل الدكتور والممرضة بركض .. وحاولوا يعدّلون الموقف ..!

شالوا محمد من الغرفة .. وحلا مازالت على نفس حالتها ..




وبعد انتهاء ايام العزاء .. باسبوع تقريبا ..

عزيزة : منيرة .. خلاص لا تجادليني ..

منيرة : عزيزة ,, والله ماله داعي ..

طلال : خالتي , بتجون تسكنون عندنا لين تتعدل الاوضاع ..

سكتت منيرة لان ماكان لها خلق تجادل

قالت منال : خالتي والله أحسن لكم ولنا ..

قال طلال بشبه ابتسامة : وتصيرون كلكم تحت عيني , وما ينقصكم شي ..!!

( كان هذا الكلام في طريق المستشفى عشان يطلعون حلا , وفي طريق العودة .. كان الكل ساكت ..

الكل دخل البيت .. وكان طلال ماسك الباب مفتوح عشان تدخل منيرة اللي كانت تدف حلا على كرسيّها ...

قالت عزيزة وهي تنزل لمستواها وتلفّ وجه حلا عليها عشان تركز في كلامها : حلا حبيبتي , انتوا بتسكنون عندنا هالفترة , ها وش رايك ؟

كانت حلا تبتسم ابتسامه معدمه .. لكنها مانطقت ولا كلمة .. وهذا كان حالها من يوم حادثة موت ابوها ..!

ماقدر طلال يوقف معاهم .. تركهم وراح غرفته .. كان يحس ان بنت خالته مظلومه ومالها ذنب في أي شي يصير ..

كل هذا بسببهم هم .. هي ماسوت شي غلط علشان يصير لها كل هذا ..

ليه حلا .. ليه ؟؟


كانت هالأفكار تدور في راسه .. بس استغفر ربه .. ومسك راسه بيدينه .. كأنه بيوقف دوران الأفكار فيه ..

راح يصلي ... ويفوض امره لله .. ويدعي ..

ما طلع من غرفته .. لانه مايدري ايش الاوضاع .. مايبي يشوف حلا في وجهه ...!

هو أصر انهم يسكنون معهم عشانه اكتشف انه مسؤوول عن 5 ..! (عزيزة ومنيرة وحلا ومنال وشوق)

مايبي يحس انه مقصر ناحيتهم .. او ينقصهم شي .. يبيهم يصيرون حواليه ..

دق الباب ودخلت عزيزة الغرفة .. مشت لين وصلت للسرير اللي كان طلال جالس على طرفه ..

جلست جمبه وقالت : طلال حبيبي , فيك شي ؟

قال بدون مايلتفت : لا يمه ..! بس محمد راح وصار كل شي فوق راسي ..!

عزيزة : لاتقول كذا , هذولي بنات خالتك ومن واجبك انك تهتم فيهم , في وجود ابوهم او غيابه ..

طلال التفت وقال بحزن : ادري يمه .. ماقصدت حلا وشوق ,, هم في عيوني والله .. انا قصدي اخوان محمد .. وبيته .. وكل شي

ما شفتيهم يمه في العزاء كيف يطالعوني ويسألوني عن محمد وعن فلوسه وبيته , ماني متطمن يمه .. احس وراهم شي ..

....... : لا ان شاء الله ماوراهم شي , لاتشغل بالك فيهم ..

حط طلال راسه عند امه وقال : ان شاء الله , كيف خالتي الحين ؟

....... تنهدت : الحمد لله , طلال انا كنت ابغى اقول لك تروح تجيب اغراض لخالتك من بيتها , مو الحين كانك تعبان , مو مشكلة بعدين ..

قام طلال : لا يمه وش بعدين , اكيد يحتاجون اغراضهم , الحين اروح .. بس قولي لخالتي تلبس عبايتها ..

عزيزة وهي تطالع ولدها باعجاب : الله لايحرمنا منك .. !

طلال ولايحرمني منك يالغالية